++ منتديات الفرح السمائى ++ elfara7 elsama2y forum ++
عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي



 
الرئيسيةالبوابةاليوميةس .و .جبحـثالأعضاءالمجموعاتالتسجيلدخولتسجيل دخول الاعضاء



شاطر | 
 

 مسرحية سفينة الحياة لأبتدائى

اذهب الى الأسفل 
كاتب الموضوعرسالة
MiNa FeKrY
• مدير عام •
• مدير عام •
avatar

كيف تعرفت علينا كيف تعرفت علينا : المالك والمؤسس
اسم شفيعك اسم شفيعك : مارمينا العجايبى
ذكر
عدد المساهمات عدد المساهمات : 451
أسم كنيستك أسم كنيستك : مارمينا العجايبى
نقاط نقاط : 1859
تاريخ الميلاد تاريخ الميلاد : 27/03/1993
تاريخ التسجيل تاريخ التسجيل : 25/08/2009
العمر العمر : 25
الموقع الموقع : قلب يسوع
علم دولتك :
الوظيفه الوظيفه : طالب جامعى
المزاج المزاج : رايق

مُساهمةموضوع: مسرحية سفينة الحياة لأبتدائى   الخميس أبريل 22, 2010 5:37 am

مسرحية
(سفينة الحياة)

يفتح الستار على فتفت وفتفوتة
وهم يلعبوا البلاى ستيشن .
فتفت : اضرب يمين يا ولد كمان اضرب شمال آه أنا أحسن واحد يلعب اللعبة دى .
بصراحة أنا مش لاقى حد زى فى اللعبة.
فتفوتة : ياسلام يا أخويا ايه الغرور ده . ما أنا كمان قعدت أضرب فيك كذا
مرة .
فتفت : بس مش أكتر منى . ده أنا فتفت أفتفت أى حد يقف قدامى شكلك وحش قوى .
هاه تلاعبنى دور تانى يا فتفوتة ؟
فتفوتة : ماشى والدور ده أنا اللى حأغلبك .
فتفت : ان كنتى تقدرى يلا بينا .
فتفوتة : حأقدر وحأوريك .
جدو أمشير : الله الله ........ يا سلام يا سلام .
فتفوتة : جدو ! ..... انت ايه اللى صحاك دلوقتى يا جدو ؟
فتفت : وايه حكاية الله الله ......ياسلام ياسلام تكونشى عامل مونولوج يا
جدو ...هاهاها.
جدو : بس يا ولد وكمان بتتريق على جدو .
فتفت : لا يا جدو أنا ما بتريقش . أنا كنت بأهزر بس .
جدو : انت عارف يا ولد انى ما بحبش الهزر ده .
فتفوتة : خلاص يا جدو ما يبقاش قلبك اسود كده . لكن قولى يا جدو , هو انت
ايه اللى صحاك دلوقتى ؟
جدو : طبعا ما انتوا مش على بالكم , دلوقتى الساعة 1 وبكرة فيه مهرجان
الساعة 9 الصبح وحتقعدوا تلعبوا وتسهروا وتناموا متأخر و آجى أصحيكم الصبح
تقولولى .....لا ياجدو احنا تعبانين ومش حنقدر نروح المهرجان النهاردة .
فتفت ايه يا جدو هو كل يوم مهرجان . فكك بكرة من المهرجان وكمان بعد بكرة
ولا أقولك كمان بعد بعد بكرة ولا تيجى نغيب الاسبوع كله .
جدو : ياسلام ! ايه اللى انت بتقوله ده ؟
فتفوتة : ايه صحيح يا فتفت الكلام اللى انت بتقوله ده . ده كلام برده .
كفاية نغيب بكرة بس .
جدو : بس يا ولد منك ليها .دلوقتى تقفلوا الاتارى ده وتروحوا تناموا .
فتفوتة : حاضر يا جدو تحت أمرك .
فتفت : أنا حأقفله مش عشان أنا خايف منك !
جدو : ايه ؟!!!!
فتفت : قصدى عشان أنا بحترمك وعشان خاطر عيونك يا جدو يا حبيبى ..........
بس عايزك يا جدو تبقى modern شوية اسمها بلاى استيشن مش أتارى .
جدو : يلا يا ولد يلا على أوضتك .
فتفت :حاضر يا جدو ... ولازم تروح المهرجان لحسن جدو يجيله جنان .
جدو : شوف الواد ولسانه الطويل ماشى يا فتفت آه أنا حأتجنن من العيال دى
لما أشوف كوجى وكركور راحوا فين . كمان دول هيخلونى أطلع من هدومى يا كوجى
يا كركور . انتوا فين .....(ويطلع من المسرح )
كوجى : ( اشمعنى اشمعنى اشمعنى اشمعنى )
كركور: اشمعنى ازاى يا كوجى ما انتى ليكى فترة بتلعبى بالفيديو جيم وانا
سايبك بس ده دورى
كوجى : دور ايه يا ابو دور انت ناسى ان اللعبة دى بتاعتى ؟
كركور: ايوة يا كوجى . انا عارف ان اللعبة بتاعتك . بس احنا المفروض اننا
اخوات . وكل لعَبنا واحدة .
كوجى : لا يا حبيبى دا كان زمان قبل ما أجيب الفيديو جيم . اصل اللعبة دى
تحفة ومخليانى مش قادرة اسيبها .
كركور: لا يا كوجى انت كدة تبقى انانية .
كوجى : أنا أنانية ؟ طب صدقنى أنا مخامصاك وقايلة لجدو عليك ..... أنا
هأروح أقول لجدو .
جـــدو : وتروحى ليه أهو جدو جه لحد عندك . مالك يا ست البنات ؟
كوجى : كركور يا جدو بيقول عليا انى أنانية .
جـــدو : صح يا كركور الكلام ده؟
كركور: صح يا جدو عشان هى مش راضية تلاعبنى بالفيديو جيم .
كوجى : شفت أديك قلت بتاعتى يعنى ألاعبك براحتى أو ملاعبكش .
كركور: شفت يا جدو ... ها ايه رأيك كدة تبقى أنانية ولا لأ ؟
جـــدو : هو طبعا كركور عنده حق بس المفروض ان احنا نطلب الطلب بذوق وما
ينفعش تقول لها كدة فى وشها بس فى حاجة انتو ناسينها .
كوجى وكركور ( مع بعض ) : ايه هى يا جدو ؟
جـــدو : ان دلوقتى الساعة واحدة وبكرة فى مهرجان و انتوا قاعدين تلعبوا
فلازم دلوقتى تروحوا تناموا عشان تصحوا بدرى .
كوجى : صح يا جدو عندك حق . احنا لازم ننام دلوقتى ونصحى بدرى عشان نروح
المهرجان وخصوصا انى المس بتحبنى وبتقول عليا انى كوجى الشطورة القمورة
العسولة . سلام يا جدو تصبح على خير .
كركور: وانا كمان هأروح أنام عشان أصحى اروح المهرجان اشمعنى كوجى ( اشمعنى
اشمعنى اشمعنى اشمعنى )
جدو : عيال آخر زمن .
(الحلم)
فتفت : ايه ده انا فين وايه اللى جابنى هنا وايه السفينة الكبيرة دى تكونش
دى باخرة وانا على كورنيش النيل .
فتفوتة: ايه ده فتفت ؟!!!! انت ايه اللى جابك هنا ؟
فتفت : انتى ايه اللى جابك هنا ؟ وايه السفينة دى تكونش دى باخرة واحنا على
كورنيش النيل ؟
فتفوتة :يمكن آه ويمكن لأ .
( كوجى قاعده على الأرض أمام السفينة وتقرأ كتاب )
كوجى : السفينة دى غريبة وعجيبة الخشب ده أنا مشفتهوش الأيام دى . أكيد دى
سفينة تراثية أصل كوجى عارفة كل حاجة أصلى شطورة وقمورة وعسولة.
فتفت : ايه ده يا كوجى انتى ايه اللى جابك هنا ؟
فتفوتة: آه صحيح انتى جيتى هنا ازاى واحنا فين بالظبط .
كوجى : ياه هو انتم كمان جيتوا هنا اصلى أنا وكركور مش عارفين جينا هنا
ازاى .
كركور: بس يا كوجى عرفت كل المعلومات عن السفينة دى ..... ايه ده مين فتفت
فتفوتة .
فتفت : ازيك يا كركور معلومات ايه اللى انت عرفتها ؟
فتفوتة : قلنا بسرعة لحسن احنا مش عارفين حاجة .
كوجى : أيوة يا كركور قلنا بسرعة احنا محتاجين نعرف كل المعلومات.
كركور: كل المعلومات هتلاقوها فى الشريط ده .
فتفوتة : شريط ايه ده ؟
كوجى : مش وقت أسئلة يا فتفوتة . حط الشريط فى الكاسيت وولع على طول احنا
متشوقين نعرف كل حاجة عن السفينة دى .
كركور : تحت أمركم .

( ترنيمة سفينة الحياة )
لوعايز تعرف حكايتى محتاج تيجى ويايا
فى رحلة مش بعيدة دى بس البداية
فيها حاجات كتير فيها كل الهداية
الى سفينة الحياة
(القرار)
دى سفينة كبيرة سفينة من التراث
قوية مش ضعيفة تقيلة فى الأساس
دى سفينة الحياة
تشق بحر غويط مليان بالأخطار
فيه الحياة أكيدة كلها أمطار
أمطار كتيرة غزيرة ما تطفيهاش النار
( يطلع سلامونه وكأنه يبنى فى السفينة وهو يرنم قرار الترنيمة )
سلامونه : ياه ده آخر مسمار دقيته فى الفلك أما السفينة دى بقيت تحفة موت
خسارة حد يركبها . المفروض نحطها فى متحف .
عم نوح : يلا يا أولاد خلاص احنا خلصنا بنى السفينة ولازم نركب بسرعة عشان
احنا ما نضمنش الظروف
ممكن تمطر فى أى وقت يا سلامونة روح قول لكل الحيوانات ان احنا جاهزين .
سلامونه : حاضر يا عم نوح حمامة ... احم احم الى كل الحيوانات كله يحضر الى
سفينة الحياة سفينة عم نوح لأننا خلصنا كل حاجة ومحتاجين نتحرك حالا.
حمارينو : ايوة يا سلامونة بس أخلص البرسيم اللى معايا وأجيلك على طول .
عم نوح : مش وقته يا حمارينو احنا مجهزين كل حاجة فى السفينه وجايبين برسيم
كتير يكفيك مدة طويلة .
حمارينو: بس يا عم نوح أنا لى برسيم من نوع خاص نوع special يعنى ها جبته .
عم نوح : ايه نوع خاص دى ...... أيوة أيوة كله موجود فى السفينة بس أرجوك
اركب بسرعة لحسن المطرة تمطر . هى فين قطقوطة ؟
قطقوطة : أيوة يا عم نوح هاجى بسرعة بس أخلص على الفار اللى فى ايدى وأجيلك
على طول .
سلامونه : وده وقت فيران برده ما هو لو المطرة نزلت هاتبقى زى الفار.
قطقوطة : آه عندك حق ......... أنا جاية حالا .
عم نوح : ياولاد هو أنا هأنادى عليكم واحد واحد أمال فين الباقى ؟
دبدوبى : أيوة يا عم نوح أنا جاى فى السكة . (وينام)
أرنوب : ايه ده يا دبدوبى عايز تروح وتسيبنى لوحدى هنا .
دبدوبى : هاه مين أرنوب انت فين يا راجل وفين أيامك .. هاه .
أرنوب : أبدا موجود . قاعد بسلى نفسى بالجزر الموجود هنا .
عم نوح :يلا يا أرنوب يلا يا دبدوبى بسرعة تعالوا لحسن المطرة تمطر دلوقتى .
أمال يا أولاد فين كمبش ما حدش شافه النهاردة .
حمارينو : حيكون فين يا عم نوح أكيد بيلعب هنا ولا هنا .
سلامونة : وده وقت لعب برده طب كان يقولى . قصدى هو مش عارف ان المطرة ممكن
تمطر فى أى وقت.
عم نوح : هو ده كمبش حياته كلها لعب وتهريج أما أنادى عليه يا كمبش يا كمبش
.
كمبش : ها ها ها أنا كمبش كمبش كمابيشو . أنا كمبش ملك الفرفشة ملك النعنشة
ملك التنطيط .
عم نوح : حلص يا كمبش وبلاش تهريج . الوقت مش فى صالحنا لازم تدخل الفلك زى
اخواتك الحيوانات .
كل الحيوانات : طب سلام دلوقتى يا عم نوح نتقابل فى الفلك بقى .
حمارينو : ما تنساش البرسيم الـ special بتاعى يا عم نوح .
أرنوب والجزر كمان هاه .
قطقوطة : أما ألحق أروح الفلك بسرعة عشان ألحق أحلص على كل الفيران اللى
جوه .
عم نوح : وأنت يا سلامونة خلى بالك منهم وبالذات دبدوبى لحسن ينام فى
الطريق .
كل الحيوانات : سلام يا عم نوح .
عم نوح : سلام يا أولاد . ياه أنا مبسوط وهم فرحانين كده . يلا يا كمبش يا
ولدى ما تضيعش الفرصة من ايدك .
كمبش : فرصة ايه يا راجل يا طيب . انت شكلك كبرت وعجزت وابتديت تقول كلام
غريب . أنا حأقعد هنا عشان ألعب وأهيص بلا تخاريف يا عم .
عم نوح : يا بنى صدقنى ده ربنا هو اللى قاللى أعمل كده أعمل كده عشان ربنا
زعلان من الناس عشان الناس نسيوا كلام ربنا وابتدوا يمشوا فى طريق الشر يا
بنى . يا بنى اسمع لصوت ربنا وما تسحش لعدو الخير انه يأثر عليك . هاه
حاتيجى معايا يا كمبش .
كمبش : آجى معاك ايه هو أنا اتهبلت فى عقلى أنا حأقعد هنا عشان ألعب وأهيص
ها ها ها .
هاه ! ..... مين دول وايه اللى جابهم هنا وايه اللبس الغريب اللى لابسينه
ده انتم مين وايه اللى جابكم هنا !
فتفت : أنا فتفت .
فتفوتة : و أنا أخته فتفوتة .
كوجى : و أنا الباش مهندسة كوجى وده كركور أحد اختراعاتى .
فتفت : بس احنا عارفين عم نوح وقصة الفلك لكن احنا مش عارفين ايه اللى
جابنا هنا .
عم نوح : أهلا بيكم فى مدينتنا . بس على فكرة احنا ما عندناش وقت أكيد طبعا
انتم سمعتونا واحنا بنتكلم عن موضوع المطرة الحقيقة الموضوع ده ممكن يحصل
فى أى وقت . هاه ايه رأيكم حاتيجوا معايا ولا لأ .
فتفت : ايه مطرة ونيجوا معاكم . هاه ايه رأيكم يا جماعة .
فتفوتة: أه أه نروح معاهم لحسن أنا خايفة قوى .
كوجى بما أنى أنا كوجى صاحبة الاختراعات العظيمة فأنا حأروح معاكم عشان
أكتشف السفينة دى من جوه . وبصراحة لأن أنا خايفة قوى وكركور معايا طبعا .
ولا ايه يا كركور.
كركور : طبعا حأجى معاكى هو أنا أقدر أسيبك .
كمبش : استنى انت يا فتفت . أنا شايفك شاب جميل وروش ازاى تصدق التخاريف دى
. انت مش عندك عقل بص كده حواليك شايف الصحراء هو ده مكان ينفع ينزل فيه
مطرة ومطرة غزيرة زى ما بيقول عم نوح .
فتفت : قصدك ايه يا عم كمبش ؟
كمبش : قصدى خسارة انك تضيع شبابك فى حبسه فى الفلك من غير لعب وتهييص
وطبعا فى الفلك مافيش حاجة من دى خالص لكن عندى أنا موجودة لعب الدنيا كلها
.
فتفت : لعب. لعب ايه ؟
عم كمبش : أوه . هو هو هوه . عندى لعب كتير . عندى بنج بونج وكورةو basket
وطايرة وكمبيوتر وبلاى ستيشن.
فتفت : بلاى ستيشن واو . أنا حأجى معاك.
فتفوتة : فتفت لأ ما تروحش معاه انت ناسى ان ده كلام ربنا لو سمحت تعال
اركب الفلك .
كوجى : وانت ناسى ان انا هأروح معاهم .
كركور : و أنا كمان .
فتفت وأنا مالى بيكم . أنا عايز ألعب وأهيص وبعدين أنا مقتنع بكلام
كمبش.مطرة ايه في الصحراء دى . ايه التخريف ده.
فتفوته : ده مش تخريف يا فتفت ده كلام ربنا .
كمبش : يلا بينا يا فتفت ..........
فتفوتة : فتفت أرجوك خليك معانا انت ناسى كلام ربنا وناسى اللى اتعلمناه فى
مدارس الأحد مش فاكر الآيه اللى بتقول ( من يحفظ وصاياي فلن يرى الموت الى
الأبد )
فتفت : أيوة فاكر .
فتفوتة: طب ليه عايز تخالفها و تشوف الموت بعينيك .
فتفت : بس ........
فتفوتة : مابسش . الوقت مش فى صالحنا يلا بينا يا فتفت يلا لو سمحت .
فتفت : كلامك صح يا فتفوتة أنا غلطان وفكرت فى نفسى وبس ونسيت كلام ربنا
أنا آسف . أنا هأروح معاك يا عم نوح هأروح مع اخواتى . سامحنى يا كمبش مش
هأقدر آجى معاك .
كمبش : براحتك يا عم . أنا مالى اللى يسمع كلام عمو ذنبه على جنبه .
فتفت : صدقنى هو ده الكلام الصح أرجوك يا كمبش تعالى معانا سفينة الحياة
وفوز بحياتك .
كمبش : حياتى أعيشها زى ما أنا عايز . ألعب أهيص أنام أصحى براحتى . لكن ما
حدش يقررهالى دى حريتى ودى حياتى .
عم نوح : براحتك يابنى بس صدقنى حياتك مش هتلاقيها غير فى مكان واحد هنا
سفينة الحياة .
-----------------------------------------
كمبش : ايه ده ايه المطر الغزير ده ياه ده شكله هو الطوفان افتحوا الباب
افتحولى أنا هأغرق الحقونى ياريتنى سمعت كلام عم نوح وفتفت ياريتنى سمعت
كلامهم افتحولى الباب هأغرق هأغرق غريق .
(ويصحى الأولاد من نومهم )
فتفت : ايه ده أنا فين ؟
فتفوتة : ايه ده بيتنا ...
كوجى :هى السفينة اتغيرت تانى ولا ايه ؟
كركور: حاجة تلخبط بصحيح .
فتفوتة : ايه ده أمال فين عم نوح وسلامونة وبقية الحيوانات وايه اللى حصل
لكمبش .
الباقى مع بعض : كمبش .
فتفت : هو انتى حلمتى كمان بكمبش .
فتفوتة : ايوة .
كوجى : وعم نوح وسلامونه والفلك . قصدك سفينة الحياة ؟
فتفوتة : أيوة هو انتم كمان حلمتم بنفس الحلم ؟؟
الباقى : أيوة نفس الحلم .
جدو : يلا يا ولاد اصحوا .......هه بسم الصليب عليكم صحيتوا بدرى كدة ازاى
؟؟ أكيد فى حاجة غلط .
فتفت : أيوه ياجدو احنا كلنا حلمنا حلم واحد بس مش عارفين تفسيره .
فتفوتة : احنا حلمنا بعم نوح والفلك بتاعه وقصة الطوفان .
كوجى : وكان فى واحد اسمه كمبش ما رضيش يركب السفينة معانا ونزل عليه
الطوفان .
كركور : وغرق أكيد يا جدو .
فتفت : بس احنا مش عارفين ايه اللى دخل الحلم ده بالذات دلوقتى .
فتفوتة : يكونشى ياجدو ده ليه علاقة بموضوع مدارس الأحد .
جدو : فعلا يا ولاد الحلم ده كله عليكم .
كوجى : علينا ازاى يعنى يا جدو احنا مش فاهمين وضح لو سمحت .
كركور : أيوة وضح لو سمحت .
جدو : كمبش رمز ليكم . لما امبارح ما كنتوش عايزين تروحوا المهرجان أما
الفلك أو سفينة الحياة هى رمز الكنيسة اللى بتحمينا من العالم الوحش ومن
الأخطار اللى فيه . عرفتوا يا ولاد قيمة الكنيسة وقيمة المهرجان ؟
وانتم كمان يا أصحابى لازم تتمسكوا بالكنيسة وما تسيبوهاش لأتها هى النجاة
لينا من أخطار الدنيا وما تنسوش انها سفينة الحياة.



We love
Him because He first loved us

I John 4:19




لكى يصلكم كل ماهو جديد وحصرى
سارعو بالتسجيل على جروب المنتدى على الفيس بوك






++
اذكـــرونى فـى صــــــلواتكـــم
++
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://elfara7elsama2y.ahlamontada.net
 
مسرحية سفينة الحياة لأبتدائى
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
++ منتديات الفرح السمائى ++ elfara7 elsama2y forum ++ :: منتديات الخدمة :: منتدى خدمة ابتدائى-
انتقل الى: